ကံကောင်းခြင်း နှင့် မအောင်မြင်မှု
အိမ်သားက စကားအများကြီးပြောသည် ။ မပြောချင်တော့ဘူး ဆိုလျှင် လုံးဝမပြောတော့ပေ။ နောက်မှ ပိဿလေးနှင့် ပစ်သလို ဖြစ်တတ်သည်။ ပြောချင်တာ ဇွတ်ပြောပစ်လိုက်သည်။ မပြောချင်သေး ၊ မလုပ်ချင်သေးလို့ ခြေတစ်လှမ်းနောက်ဆုတ်သည် ဟု ပြောကြသည်။ သို့သော် ကံဆိုးချင်တော့ နောက်ဆုတ်သော ခြေလှမ်းက ချောက်ထဲသို့ကျသည်။ ကံကောင်းချင်တော့ ချောက်ထဲမှာ နှစ်ပေါင်းများစွာက ယခုတိုင်အောင် အသုံးပြုနိုင်သော သိုင်းကျမ်းကြီးကို တွေ့သည်။ ကံဆိုးချင်တော့ သိုင်းကျမ်း၏ အနှစ်ချုပ် နောက်ဆုံး စာရွက်က မပါချေ ။ ကံကောင်းချင်တော့ ချောက်ထဲ၌ နှစ်ပေါင်း ရာထောင်ချီနေနိုင်ပြီး အတွင်းအားကောင်းစေသော သစ်စေ့များ ၊ သစ်ဖုများကို စားသုံးရသည် ။ ကံဆိုးချင်တော့ ရေသောက်သောအခါ အာခေါင်တွေ ပူလောင်နေရသည်။ ကံကောင်းချင်တော့ ပူလောင်မှုအတွက် မိုးရေတွေ ရွာကျသည်။ ကံဆိုးချင်တော့ ဗွက်တွေကြောင့် ဘယ်နေရာမှ သွားလို့မရ ။ ကံကောင်းချင်တော့ မိုးတွေရွာလျှင် အလွမ်းတရားကြီး အပီအပြင် ကျင့်ခွင့်ရသည်။ ကံဆိုးချင်တော့ ဘာကိုလွမ်းမှန်းမသိ ။ ကံကောင်းချင်တော့ ကံတရားကြီးက ကိုယ်ဘက်ပါသည် ။ ချောက်ထဲမှ လွတ်လမ်းကို မြင်ရသည်။ ကံဆိုးချင်တော့ ချောက်ကြီးက နက်ရှိုင်းလွန်းလှသည် ။ တော်တော်နှင့် အပေါ်ကို မရောက် ။ ကံကောင်းချင်တော့ အလွမ်းသိုင်းကျမ်း နှစ်တစ်ရာ အတွင်းအားသုံး၍ အပေါ်ကို ရောက်ခဲ့သည်။ အောင်မြင်ပြီဟု ကြွေးကြော်နေချိန် မှန်တစ်ချပ်ကို အနီးအနားမှာ မြင်လိုက်ရသည်။ အရိုးပေါ် အရေတင် သင်ခွာရင် ရပြီလို့ လာပြောပြနေသော ရုပ်ခန္ဓာတစ်ခု ကို တွေ့လိုက်ရသည်။ မအောင်မြင်မှုများဖြင့် သေဆုံးခဲ့လေပြီ ။
No comments:
Post a Comment